هل هناك عيب مصنعي في الماكسيما ؟

[Maxima 2001]

السلام عليكم ،

أولاً أتقدم بالشكر للقائمين على هذا الموقع المتميز الذي يشكل فائدة كبيرة لمالكي سيارات نيسان وأتمنى لهذا الموقع المزيد من التقدم.

يا جماعة الخير .. عندي نيسان ماكسيما 2001 قير اوتو ولاحظت عليها بعد فحص 50000 ان الماكينة صارت أثقل من الأول وأنك مهما تدوس تظل حركة السيارة ثقيلة .. وفوق كذا لما يبدل القير تحس بالسيارة تنتع بشكل مو طبيعي ، غير ان الماكينة تقطع ويكون الريس نازل أول ما أشغلها (لما تكون باردة) .

وبما أن السيارة لا زالت على الضمان ، رحت للجبر في الدمام أكثر من مرة ولكن النتيجة دائماً (بناء على فحص الكمبيوتر سيارتك سليمة) ، وصارت شغلة ، وتنزل القير وتبدلت الكلتشات ، وعملت تصفية ماكينة ، ونزلت زيت القير بدون أي فايدة. بل بالعكس المشكلة زادت و صارت السيارة تطفي إذا شغلتها وهي باردة .

المهم اني فحصت السيارة عند ترايستار وقالوا لي انها مشكلة كهرباء تتعلق بالهواء ، وأخذت تقرير بالمشكلة ، ورجعت للوكالة ، وفحصوا كهرباء السيارة وتأكدوا ان فيه مشكلة في منظم الهواء (قطعة اسمها بالانجليزي Air Flow Meter) وبدلوها ، والحين أحس السيارة زبطت ورجعت نعومتها في القيادة وسلاستها في التبديل .

السؤال هو : أعرف 3 أشخاص غيري عندهم السيارة نفسها ، وبدلوا هذي القطعة لأنها تخترب عندهم .. فما هذه العلة في الماكسيما ؟ هل هي عيب مصنعي ؟

سؤال ثاني : اذا كانت السيارة واقفة وجيت تدوس بنزين تبي تمشي وفجأة شلت رجلك عن الدواسة قبل ما تزيد السرعة (مثلاً تفاجأت بواحد يقطع الطريق أو شي من هالقبيل) .. أحس ان القير يبدل تبديلة ملحوظة .. يعني تحس لها انها مش بالنعومة العادية لما تكون ماشي طبيعي من غير ما تشيل رجلك .. فهل هذا الشي طبيعي وفي كل المكسيمات أو هو بس عندي أنا .. علماً بأن سيارتي من أول ما خذتها وهي ما تجيب فوق ال 190 كلم ، ومرة بالغلط جابت 200 كلم ؟

وشكراً لكم مرة أخرى على هذا الموقع اللي فاجأني بصراحة .

[باثفايندر]

بالنسبة لسؤالك الثاني
انا عندي نفس المشكلة وخصوصا لما يكون القير ببداية النمرة الثانية ولما اهد دواسة البنزين يرد للنمرة الاولى مع صوت طقة بالقير وهذا غير موجود بالسيارات ال4X4 الاخرى

[MAXIMA 020]

السلام عليكم
ادري اني جديد ودخلتي على الموضوع شطف مالها داعي ولكن شدي موضوعك انا الان سيارتي فيها نفس المشكله مديلها 2001 بعض الاحيان اذا دعست عليها تحس ان السياره مكتمه وما تتجاوب معك واذا حصلت التكتيمه هذي فان القير يبدل بشكل خشن مره رحت فيها للوكاله (الجبر والحمراني) كلهم يقولون ان سيارتك سليمه المشكله يركب معي الفني الي يعتقد انه فني وانا احس بالكتمه وكل الشباب الي ركبو معي يحسون فيها يجي هو ويقول عادي كذا القير يبدل ؟؟؟؟؟؟؟؟؟(14)(14)(14)(14)(14)؟؟؟؟؟؟؟؟؟؟ اي عادي والله السياره الى الان تشتكي من المشكله هذي اخرتها الحمراني يقولي لازم يتغير الكمبيوتر حق السياره ياخي والله مستخفن بالعالم الله لا يوفقهم اذا بنيتهم استغلال العالم لا ويقول ان سعر الكمبيوتر 4000 ريال قلت يا حبيبي السياره جديده كيف يخرب الكمبيوتر اصلا هو مش مصمم عشان يعيش سنتين ويخرب والله بكل معنى الكلمه يستخفون بالعالم هذا الجبر اما الحمراني يقول ان القير يبيله فك عشان نكشفه ليش لانه حس بالنتعه او بالاحرى خشونت القير يوم جربناها للمره الثانيه لان في المره الاولى قالوا ما فيها شي(13)(13)

انا بيني وبينكم انجنيت مادري وين اروح وين تنصحوني افحصها بس بشرط مكان غير الوكاله مع ان اعراض المشكله زي الى قلتها يا maxima 2001

[MAXIMA 020]

وعلى فكره السياره الحين ماشيه 65 الف كلم يعني طار الضمان

[Maxima 2001]

الأخ باثفايندر /
شكراً لتواجدك معنا في الموضوع ، وبالنسبة للمشكلة اللي في النمرة الثانية في القير فهل انحلت المشكلة عندك ؟ وإذا انحلت إذا ممكن تضع الحل مشكوراً .

الأخ MAXIMA 020 /
أهلاً بك ، وبالنسبة لمشكلة سيارتك اللي مثل ما تقول نفس الأعراض اللي في سيارتي ، فأنا صادفت الشي اللي انت صادفته من الفنيين بالضبط .. أكثر من 4 مرات آخذ السيارة للوكالة ، وجربتها مع الفنيين بنفسي ، وكانوا يحسون للتبديلة الخشنة بس كانوا يقولون انها طبيعية وتحصل في كل السيارات !! .. وطبعاً أنا ما أقتنع بهذا الكلام لأني متأكد ان السيارة ما كانت تعمل كذا من قبل ، والشباب يقولون لي نفس الكلام وأقارنها مع ماكسيمات الشباب وأحس بالفرق الواضح .. لكن الوكالة تقول انها طبيعية !! حتى اني جربتها مع مهندس ياباني من النيسان ، وقال انها طبيعية !! .. غير انهم فتحوا القير وبدلوا الكلتشات من غير ما تنحل المشكلة !! ..

لكن اللي فادني بصراحة هو ترايستار لأنه شخص لي العلة في خلال نص ساعة بس وقال لي انها شغلة هواء ، ولما رحت للوكالة كانوا هم مقتنعين تماماً ان السيارة سليمة وأنا مقتنع تماماً بالعكس ، لكن الحمد لله ان تقرير ترايستار أنقذني وساعد مهندسين الوكالة على معرفة العلة ، وبعدين بدلوا القطعة وزبطت السيارة ، والحين هي الحمد لله لينة وناعمة وقوية مثل الأول تمام .. ما عدا اني خسرت في حاجتين :

الأولى ان القير انفتح من غير داعي والسيارة لسه جديدة !

والثانية ان لي شهرين أركض ورا السيارة والوكالة ، وتطلع من الوكالة منا ، والا مدخلها يوم ثاني منا واتبهدل لي كم يوم من غير سيارة وتكلفت عليها مصاريف مالها داعي .

لكن الحين أأكد ان السيارة تمام بعد تبديل (air flow meter) .. واذا تبغي تعرف تكلفة هذي القطعة فهي كالتالي :
القطعة تكلف حوالي 420 ريال ، و اذا عملتها عند الوكالة تطلع التكلفة الإجمالية حوالي 650 - 700 ريال (وهذا كلام الشباب اللي بدلوا هذي القطعة بعد انتهاء الضمان)

أتمنى اني وضحت تمام .

والحين نرجع للسؤال المطروح : هل هناك عيب مصنعي في هذه القطعة في الماكسيما ؟
والسؤال الآخر المتعلق بتبديلة القير الأوتو لما تشيل رجلك عن الدواسة فجأة (انظر المشاركة الأولى في هذا الموضوع) .

[MAXIMA 020]

والله يا اخ maxima 2001 من كلامك عن المشكله كأنك سايق سيارتي قبل كذا كل شي قلته موجود في سيارتي ولا فيه اي زياده

انت تسأل هو عيب مصنعي او لا انا اقول 100 % عيب مصنعي بس وين تبي الجبر او الحمراني يعترفون فيه اجحدددددد(7) انا قبل يمكن سنه قريت في الجريده خبر عن فلفو ان في نوع من انواع الفلفو فيها عيب تصنيعي في قطعه في المكينه وان الشركة تظالب من جميع من اشترى السياره مراجعت اقرب مركز صيانه ياخوي تحس انهم يهتمون في العميل
انت خلك من المشاكل الي في السياره فيه مشاكل فيهم في نفس تنظيمهم للوكاله من تأخير في تسليم السياره الى قلت الايادي العامله الي في الورش وقلت خبرتهم (اعيد و اكرر قلت خبرتهم ) بالعربي ما عندك احد شلت زوله ما يفهمون شي والله لو اني مسأول في الغرفه التجاريه كان نفلت بلاويهم

وخلني اقولك شغله عشان ما اظلم احد انا ما قلت الكلام هذا عن الفنيين الا يوم ركبو كلهم في السياره و قالوا ما فيها شي مع ان السياره فيها خراب وواضح ولكن نضرت الفني للمشكله او خلني اقول اذا سمح التعبير رخووم يعني ما يحس او يعرف بالي يصير حوله مع انه فني ومارس الشغله هذي اكثر مني ومنك ولكن ما يعرف يحدد المشكله بالظبط يعني المشكله طلعت في قطعه خاصه في الهوا وش دخل القير انا كفني راح اكون عارف ان السياره اذا تعثر شي في مجرى الهوا للسياره راح تبدل السياره بشكل خشن ابي افهم ليش ما فكر التفكير هذا وانا لاكون صادق معك اني قبل لا ادخلها عندهم وتصير البلاوي هذي كلها كنت شاك ان السالفه خاصه في مجرا الهوا للمكينه ولكن زي ما قلت نظرت الميكانيكي تختلف زي الطبخ والفن في الطبخ (12)(12)(12)(8)(8)(8) (تروني جوعان يوم اكتب الكلام هذا)

على كل اسف على الاطاله وما كثرت الكلام هذا الا من حر ما في قلبي (14) ولكن شكلي يا maxima 2001 راح اغير القطعه هذي بدون ما افحصها عند اي ورشه لانه واضح انه نفس المشكله بالظبط

انا بس حبيت تقولي مره ثانيه ايش اسم الورشه الي ظبطت سيارتك عنها ووين مكانها بالظبط وممكن تعطيني رقم تلفونهم

مشكور ومره ثانيه اسف على الاطاله(4)

[باثفايندر]

Maxima 2001
مشكلتي تكمن في القير وتبديل النمره حيث ان سيارتي قير اوتو ومن اول ما طلعتها من الوكاله اسمع هالطقة عند تبديل القير من النمره الثانية الى الاولى حتى اني احس باهتزاز عصا القير عند الطقه
وهذا العيب موجود ايضا بالباترول والباثفايندر ومادري عن موديلات 2002 وما بعد لان سعة المكينة تغيرت ونمط القير تغير ايضا وانحلت المشكله على ما اعتقد

[Maxima 2001]

معذرة على التأخير ،

الأخ MAXIMA 020 /

الحقيقة ان الورشة اللي صلحت فيها سيارتي هي الجبر في الدمام (الوكالة) ، لكن الذي شخص العلة بعد أن استعصى التشخيص في الوكالة هي ورشة (ترايستار) - الشركة السعودية للقير الأوتوماتيك ، وهي تقع في الخضرية على طريق الظهران الجبيل السريع وتكون على يمينك إذا كنت متجهاً ناحية الجبيل وتراها بسهولة بعد كبري شارع الملك سعود . ت 8380087 ولها فروع أخرى في المملكة أيضاً .

ولكنني لا أعلم إذا كان يبدل القطعة أم لا ، فالذي عملته عنده هو مجرد تشخيص لسيارتي ولم أصلح عنده شيئاً ولا أدري إن كان يصلح هذا الخلل أم لا ؟!
رقم القطعة (air flow meter 22680AD210)

أخ MAXIMA 020 / إذا زبطت سيارتك الرجاء أن تخبرنا هنا في المنتدى لنستفيد المزيد حول هذه العلة الغريبة في الماكسيما .

الأخ باثفايندر /
بالنسبة لطقة القير فلقد سألت شخصاً آخر يملك نفس موديل سيارتي ، وأخبرني أن ذلك أمر طبيعي يحصل في كل السيارات اذا رفعت قدمك عن الدواسة قبل أن يبدل القير مباشرة .

لنا عتب على الخبراء من الأعضاء ، وغيرهم من الأعضاء العاملين لدى نيسان بسبب تجاهلهم لهذا الموضوع المهم لكل مالكي الماكسيما بسبب حساسية هذه المشكلة وانتشارها بين عدد كبير من الماكسيمات مما يزيد الشك بأن هذه العلة ناتجة عن عيب مصنعي .
نرجو من الخبراء والعاملين لدى نيسان إفادتنا بالخبر اليقين حول ما إذا كانت هذه العلة ناتجة عن عيب مصنعي ، فإن ذلك من شأنه جعل مهندسي الصيانة في الوكالة يتنبهون لهذه العلة بدلاً من اعتبارها شيئاً طبيعياً مما يسبب إحراجاً للوكالة والزبون في نفس الوقت

ولكم الشكر

[التايه]

معلومات حلوه والله يعطيكم العافيه

[Maxima 2001]

شكراً لك أخي الكريم / التايه
على مرورك على موضوعنا هذا ، وأتمنى من كل من له خبرة في هذا الموضوع أن يشاركنا لتعم الاستفادة ونتوصل إلى نتيجة مرضية من خلال هذا النادي المتميز نادي عشاق نيسان .

[مجنون مكسيما]

المكسيما العيب المصنعي فيها هةair flow meter
وهذي القطعة هي التي تتحكم في نسبة الهواء الداخل إلى لفيول انجكشن

ومعظم المكسيمات من موديل 2000 إلى 2003 نفس العلة هذي القطعة قيمتها في البحرين 38 دينار يعني 380 ريال سعودي

في البحرين هذي مشكلة المكسيما الأولى

ومن ناحية القير فهو طبيعي إذا البداية يقطع او ينتع فهو امر معروف في المكسيما بس إذا السيارة تمشي في السرعات العالية ما تسمع صوت القير مثلاً من 60 إلى 120 km ما تسمع صوت التباديل

وترى احنا في حاضرين لكم وإلى إستفسارتكم مقضي طول عمري وي المكسيمات والتصليح فيهم

[adel]

Maxima 2001
سامحنا على التاخر في الرد عليك بس انا الان في اجازة من حوالي اسبوع لذلك لم استطع الرد

نعم هناك مشكلة ال Air Flow Meter و مشكلتها الرئيسية حسب معلوماتي ان هذه القطعة حساسة جدا و الجو عندنا في الخليج جدا حلووووووووو و مليء بالغبار و الاتربة و هذه اهم شيء يؤثر على هذه القطعة و يؤدي بها للعطب و هي ليست عيب في جميع السيارات لكي تعتبرها عيب مصنعي فهناك سيارات يتم تغيير هذه القطعة في اقل من 60000 كم اكثر من مرة و هناك سيارات وصلت 100000 كم و لم تتغير بها هذه القطعة

هذه المعلومات التي امتلكها لكن لست متأكد منها مئة بالمئة

[راعي الماكس2003]

كنت مهتم كثير بعمل الفحص في مواعيده وفي يوم الخميس ذهبت للوكالة الحمراني عندنا بالرياض وبعد ماعملت فحص ال 15 الف كيلو متر خرجت بالسيارة بعد ان قامو بتغيير زيت الماكينه والسيفون وتنظيف فلتر الهواء

ذهبت على جسر الخليج متجه الى البيت وانا في منتصف جسر الخليج صارت السيارة تقطع او تنتف على قولتنا بالعاميه المهم صارت السيارة كل شوي يقل عزمها وتقطع حتى وصلت الى مركز هيف التجاري قبل اشارة شارع التخصصي
ثم طفت السيارة بي وسط الطريق تخيلو وقفت السيارة معي في اهم وازحم طريق بالرياض ويوم خميس ولكم ان تتخيلو قد ايش صرت في ورطه وخوف على نفسي وعلى سيارتي الجديده وش كثر كنت متضايق لاني توني طالع من الوكالة ويقولون سيارتك اوكي خلاص جاهزه جلست بوسط سيارتي في الطريق بعد ان سرت بالسيارة يمين الخط واجلس فيها وانا اتصل وابحث عن اقرب صديق لي بالموقع اللي انا فيه يجي لي علشان يطلب او يجلب لي سيارة ونش( سطحه )
المهم مادريت الا وراي سيارة دورية الشرطه يضرب لي بواري ويقول اطلع وانا انزل عليه واعصابي مره على الاخر قلت ياخوي وش تبي اسوي السيارة متعطله قال خلك في السيارة واركب وانا بدفك بالدوريه قلت اوكي طلعني الين صرت على خط الخدمه ولما نزلت وجدت صدام سيارتي الخلفي وقد تاثر ببعض الخدوش من صدام الدوريه حينما كان يدف سيارتي من الخلف فقلت حسبي الله عليكم من وكاله كله بسببكم بصراحه صرت افكر ان السيارة اي كلام واني انا غلطان لما اشتريتها وخصوصآ ان السيارة جديده مامشت غير 15 الف كيلو
قفلت السيارة وذهب مع تاكسي ليموزين الى صناعية حي ام الحمام وجبت ونش ( سطحه ) وذهبت بالسيارة الى ورش صناعية ام الحمام طبعآ بتقولون ليش مارجعت للوكاله بقلو لكم اني في يوم الخميس وكان الوقت المغرب يعني الوكاله قفلت ومايفتحون الا بعد بكره يعني يوم السبت المهم لما ذهبت الى الصناعيه وداني راعي الونش الى ورشه يقول عنها كويسه لما نزلة السيارة عندهم وشرحت لهم الحاله قالو افتح الكبوت كان عندهم خلفيه بالمشكله من قبل من كثر ماجاهم ناس من قبلي واخذو يتفحصون الحساس حق موزع الهواء قالو لي ياخوي اللي نظف لك فلتر الهواء نسئ ان يسد مجرى الهواء اللي يدخل على الحساس الالكتروني وعلشان كذا دخل غبار في الحساس وخرب معك وقالو تبي نغيره غيرناه لك بس ننصحك ترجع للوكاله وتغيره لان سيارتك على الضمان لكن الحين بنفضل اسلاك الكهرباء عن الحساس تمشي نفسك الين توصل البيت وننصحك ماتكثر المشاوير عليها ولاتسرع ولما فصلو الاسلاك مشت السيارة بس عزم كنه عزم سيكل مو حتى عزم دباب بعد مادفعت للورشه خمسين

استاجرت سيارة طبعآ لاني محتاج للسيارة يوم خميس وباكر جمعه وعلشان ماامشي مشاوير على سيارتي كثير
وانتظرت يوم السبت بفارغ الصبر وجيت الوكاله وسيارتي يادبوك تمشي ولما شرحت لهم وبينت انهم المشكاله وانهم ماسدو فتحة فلتر الهواء عند التنظيف وانه دخل عبار وسبب خراب في الاحساس للموزع الهواء الالكتروني

قالو اوكي بنغيره لك على الضمان وكانت قيمته بــ 580 ريال سعودي وقلت الحمدلله انه على الضمان ولكن دفعت قيمته من جيبي قلت طيب والخدوش اللي صارت بصدام السيارة الخلفي من يصلحه سكتو قلت طيب انتم عارفين انكم عرضتو حياتي للخطر لان سيارتي تعطلت بي في منتصف الطريق ياناس خلو عندكم شوية ذمه وضمير في عملكم وفتحو عيونكم زين لما تشتغلو في حلال الناس
وطلعت وانا اقول بلا فحص بلا خرطي فاضي
ووجدت ان هذي مشكله في كل الماكسيمات

اخوي Maxima 2001

بالنسبه لسوالك الثاني / نعم معي نفس الحاله بس مااعتقد انها مشكله لانه الظاهره انها طبيعيه

[M L M]

السلام عليكم ورحمة الله وبركاته :

إلى الأخوان الأعضاء اشكركم على هذا الموضوع المهم بس انا عندي معلومة مهمة ما سألتوا انفسكم عليها ليه هالقطعة تخرب ( Air Flow Meter ) انا عن نفسي حصلت لي نفس المشكلة ( ماكسيما 2002 ) أنا في اعتقادي بسبب التدبيل في الجكر ( المطارحات ) هذا ما قلي عليه المهندس المشرف في الشركة وأكيد حيكون خبرة .... و للأخ Maxima 2001 على كلامه ان السرعة عنده ما تجاوزت 200 كلم بعد هذه السرعة غير على رقم 2 وبعد كذا ارجع على D بعد ما تجي السرعة المطلوبة ...



هذه أول مشاركة لي و ان شاء الله اكون صديق خفيف للاعضاء

[المهندس_صالح]

السلام عليكم ورحمة الله وبركاته
انا ارغب واتمنا اقابل شخص عنده ماكس الفين اوبعدها وما طلعت عنده المشكله حقت المنظم

كل اللي عندهم مكسيمات عندهم نفس المشكله

هذا الشي يقودنا لسؤال اكثر خطوره واهميه وهو مادام الوكاله والشركه عارفين ان المشكله موجوده في الفين فلماذا لم يتداركونها في الموديلات اللاحقه ؟؟؟؟؟؟؟؟

ومثل ما علمت بان هذي القطعه هي اكثر قطعه تشترى من الوكاله واقصد من القطع الكهربائيه

هل الشغله يابو حمراني او يا شركة نيسان عمليه استغلال وتلاعب بزبائنكم الذين وثقوا فيكم وشروا السياره من عندكم ؟

انا اطالب وحالي حال جميع ملاك نيسان باستبدال هذه القطعه وبالمجان لجميع الملاك وحتى لو تجاوزوا فترة الضمان

والعذر الوحيد عندهم في الوكاله هو ان جونا هنا حار وغبار واجد
طيب اذا الجو عندنا ما يناسب السياره هذي ليه تجيبونها ؟؟؟؟؟؟؟؟

ماقصد التجريح ولكن اتمنا ان تطور شركة نيسان ووكلائها من خدماتهم لأن خدمات ما بعد البيع لها اهميه كبيره جدا

تحياتي للجميع
المهندس_صالح

[adel]

اخوي مهندس صالح

القطعة لا يوجد بها مشكلة اساسا لكن المشكلة تكمن في حساسيتها المفرطة و الجو الغبار اللي عندنا هو اللي يأثر عليها و يؤدي الى تلفها