حرارة الماكسيما بهذلتني ... وينكم يا أصحاب الخبرة

[Q45]

السلام عليكم و رحمة الله و بركاته

انا معي ماكسيما 2000 ماشي عليها 243 ألف كم ، قبل فترة قبل ما يشتد الحر كانت الحرارة عندي تطلع فوق النص ، و رحت لواحد من حقين الراديترات وشيك على السيارة و قال ان عندك روس المكينة يبي لها تغيير ، وبما انها تكلف قال خذ لك مكينة مستعملة احسن و ارخص لك

عباها موية ذيك الايام و مشت الامور ، لكن هالايام بدت تطلع الحرارة للنص و تتعداها للثلثين ، والحرارة تبهذلني بزيادة لما تكون السيارة واقفة ، اذا مشيت ( بركادة ) تنزل وتصير طبيعية لكن لما احط رجلي ( ادعس ) ترتفع

في الليل اذا كانت درجة الحرارة حوالي الاربعينات ترتفع الحرارة للنص ، اما اذا كانت دون تكون الامور زينة

علموني يا جماعة هل المشكلة زي ما قالوا من روس المكينة ؟ ولا فيه شي اغيره و تضبط الامور ؟

هالموضوع مقلقني ، ساعدوني و ارشدوني الله يوفقكم لكل خير

[راعي ألتيما]

والله العظيم يا حبيبي ما عندي خبرة في الماكس بس واحد من أصحابي عنده نفس موديل سيارتك بالتمام وكانت الحرارة ترتفع فوق النص خصوصاً لما يدعس وفي الخطوط الطويلة راح غير اللديتر من الوكالة جديد بكرتونه وصلحت السيارة ورجعت تمام 100%
بس الشيء الوحيد اللي أقدر أقوله لك هو .... ربنا يوفقك وييسر أمورك واسأل الله أن ترجع سيارتك مثل أول وأزين .... ما تشوف شر ياغالي .... وبالتوفيق ،،،

[مجروح النيسان]

ماتشوف شر ياالغالي


والله مابي اتفلسف عليك لاني ماعرف للمكسيما

انشاء اصحاب المكسيمات مايقصرون معاك

وانشاء الله الامور تكون سهلة ...

[شاعر مشاعر]

وعليكم السلام ورحمة الله وبركاته

ماتشوف شر إن شاء الله

بالنسبة لمشكلتك أنت ماقلت لنا هل ماء الرديتر ينقص ولا مثل ماهو

إحتمال يكون من الرديتر نفسه ..

[المكس الضبابي]

^^ نفس كلامه ... وشوف المراوح يا اخوي تشتغل ولالا ... لان اذا ارتفعت الحراره والسياره واقفه

اكبر احتمال للعطل هو المراوح

[EHAB]

ما تشوف شر ان شاء الله

حاول اخوي تغير الاشياء البسيطة اولا ولا تسمع كلام ميكانيكية هاليومين

تراهم مصدفين وما يدرون وش السالفة

اقترحلك تغير الرديتر وهو الاحتمال الاكبر لهذه الحرارة وشيك على المراوح ترى لها اتوماتيك يشغلها عدة سرعات

وان شاء الله خير

واللي قالك راس الماكينة ترى هذا احتمال مستبعد ويبي يسوي شغل وخلاص

راس الماكينة ما تخرب الا اذا مشيت على السيارة بدون موية او انك فتحت الرديدتر وهيا حارة او انك زودت موية للسيارة وهيا حارة فقط

تقبل مروري

موفق ان شاء الله

[barham]

والله انا كانت معاي ماكسيما 2000 و ما ارتفعت علي الحرارة حتى في مرة هوز الراديتر قام يسرب ماي و ما دريت الا بعد ما وديتها حق السرفس و قال ترى الهوز يسرب وبدله لي و ما ارتفعت عندي درجة الحرارة ....
واخوي ما ادري شيك على الراديتر اولا ثم على المراوح يمكن يكون هذا السبب

[نواف5]

خوي Q45 لوكانت الحرارة تنزل عندما تمشي على السيارة هذا يعني ان المراوح لا تعمل !!!(او ان فيوز المراوح احترقت)
لكن المشكلة انك تقول انها ما تنزل اذا دعست عليها ( والمفروض انها تنزل اكثر لأنه عند الدعس يجي الموتر هوا اكبر) ....
لذلك عندي لك سؤال هل الرادييتر سيخته قبل والا لا ... او هل غيرته قريب والا لا؟؟؟
اذا كان توك مغير ارادييتر (او مصيخ الرادييتر قريب)اذن هذا معناه ان الخلل مو من الرادييتر ولذلك اتوقع ان بلف (منظم=الثرموسات) الحرارة عطلان ويبي له تغيير وسعره حوالي 100ريال سعودي او اكثر بشوي
الاحتمال الاخير (وهو بعيد) مثل ما قاللك الميكانيكي ان الروس فيها شعر لأنه متعرضه لحرارة جامدة قبل!!!
وان شاء الله تكون مشكلتك بسيطة

[BIG TIME]

ما تشوف شر ان شاء الله

حاول اخوي تغير الاشياء البسيطة اولا ولا تسمع كلام ميكانيكية هاليومين

تراهم مصدفين وما يدرون وش السالفة

اقترحلك تغير الرديتر وهو الاحتمال الاكبر لهذه الحرارة وشيك على المراوح ترى لها اتوماتيك يشغلها عدة سرعات

وان شاء الله خير

واللي قالك راس الماكينة ترى هذا احتمال مستبعد ويبي يسوي شغل وخلاص

راس الماكينة ما تخرب الا اذا مشيت على السيارة بدون موية او انك فتحت الرديدتر وهيا حارة او انك زودت موية للسيارة وهيا حارة فقط

تقبل مروري

موفق ان شاء الله

اقرب حل والراس اذا مشعور تاكد من عيار الزيت اذا فيه فقعات ماء او لونه بيج حليبي

هذا الراس واتوقع مشكلتك لاتخرج عن ثلاثة الرديتر اذا ماغيرته من زمان فاكيد منه وكلتش المروحه

وفي الاخير طرمبه الماء والبلف

[ددتسن85]

تسسيخ راديتر وان شاء الله تضبط
راديتر المكسيما صغير ويتوسخ بسرعة

[MAX^2004]

افحص الرديتر

والأشياء المتعلقة به

وإن شاء الله مشكلتك بسيطة

[Q45]

جزاكم الله خير يا اخواني على الردود و التفاعل

امس رحت لواحد ثاني و شيك على الراديتر و الحرارة و قال يبي لها تسييخ ( تنظيف ) ، و شاف واحد من الخراطيش و لقاه يهرب مويه و آثار المويه المتسربة واضحة على المناطق اللي حول الخرطوش

حتى فيه وحده من المراوح تطلع هوا حار اكثر من الثانية و اعتقد ان هالشي يدل على ان الراديتر متقفل من تحت يعني يبي له تنظيف زي ما قال

انا متردد ما بين اني اغير الراديتر بواحد جديد او اني اسوي له تسييخ علما بأنه بيكون ثالث تسييخ للراديتر ، التسييخ بيكون اوفر لي لكن هل تسييخ الراديتر ثلاث مرات ما يأثر عليه ؟

انتظر رايكم يالغاليين

[@أبوعبدالرحمن@]

أخوي من رايي تغير اديتر افضل لك لان اديتر المكس رصه وحده وكثر التسييخ ماراح يفيد معك وغير كذا ماقصر له 8 سنوات في السياره وباذكر لك كم شغله غير تغيير الاديتر وبعدها بترتاح من الحراره باذن الله
بعد ماتغير لاديتر بواحد اصلي غير بلوف الحراره وترى المكس يجي فيها بلفين
ثم اشتر طقم خراطيش (ليات) لان العمر الافتراضي للقديمه انتهى
شيك على المراوح وتاكد أن اشتغالها مضبوط ومافيها مشكله في التماتيك أو الكتاوت
اشتر غطاء اديتر اصلي وتراه رخيص والناس ماتعطيه اهميه وهو يسبب بلاوي
اشتر ماء اديتر اصلي فوكس حبه وحده واشتر معه ماء مقطر >> ترى ماء الاديتر فوكس يبناع في الوكاله
ونظف قربه الزياده وعبها شويه مويه خضراء والباقي مقطر
وبعدها ماراح تشوف الحراره وترجع سيارتك مثل اول واحسن إن شاء الله

[barham]

والله اخوي اذا انت مجرب التسييخ خلاص بدل الاديتر احسنلك و صدقني ترتاح بس لازم يكون اصلي

[المكس الضبابي]

تسييخ راديتر المكسيما مره وحده وخلاص ماعاد يصلح .... اذا ميزانيتك تعبانه اشتر راديتر كوري ..

مو صيني . بـ 350 ريال ...

[MAX^2004]

شوف أخوي

إذا انت ناوي تبيع السيارة بعد فترة قليلة

ركب لها رديتر مش أصلي مثل ما قال أخونا المكس الضبابي

أما إذا انت ناوي ان السيارة تقعد معك أكثر من 5 سنوات


فانصحك اشتر لك واحد أصلي

وبالتوفيق أخوي

[مكس فضي 376]

آخــوي انا بكلمك

انا قد صارت معي مكس 2001 ترتفع حرارتها

سويت لها تسييخ ومافاد ..من قوتها الحراه وربي وصلت الآتش ..سويت لها تسييخ ثاني وبرضو مافاد

صراحه زقهت انا منها وديتها للورش اللي يقول الراس والي يقول غير الرديتر وتضبط واللي يقول الحساس وكل واحد وكلامه

وديتها لمحل رديترات مشهور عندنا بالقصيم ( السيف ) << هذا اسمه

قلت له شف وش البلى اللي فيها

الموهيم اخونا في الله ماقصر قال البلى هو التسييخ ؟

قلت مسيخها قبل كذا مرتين وبـ اقل من شهر

قال انا راح اسيخها وافحصها واشوف وش فيها

جيته من بكرا لقيت الموتر ماشاء الله تبارك الله مضبوط ميه بالميه

اثر البلى من (( البساتم)) كانت متسددهـ وسوا لها تنظيف وتسييخ للرديتر وطلعت احلى من العسل

ووين كلام اللي يقول الراس واللي يقول مادري ايش

طلعوا ماعندهم سالفه



هذا اللي اقدر افيدك فيه اخوي وبالتوفيق لك

[المكس الضبابي]

^^ بساتم ؟؟

[مكس فضي 376]

^^ بساتم ؟؟

يمكن ماعرفتوهآ انتم يااهل الرياض ^_^

فتحات دخول الماء من الرديتر للمكينه

[المكس الضبابي]

تقصد الخراطيش ؟

[arabic]

والله بساتم اسم غريب

فكرت بستم المكينة هههههه

والله اعلم ممكن انه يقصد بلف الماء

[Q45]

الحمد لله الحين امور السيارة تمام التمام بفضل الله ثم مشكورتكم

سويت تسييخ للراديتر و صارت الامور مضبوطة ، الحرارة ما تتعدى الربع و اذا حطيت رجلي توصل للثلث و بعدين ترجع لمكانها الطبيعي ( الربع )

الله يجزاكم الف خير و شكر خاص لاخوي مكس x مكس على اهتمامه الخاص بمشكلتي ، وان شاء الله اتواصل معك يالغالي في حال وجود أية مشكلة بالسيارة مستقبلا

[ابن صقيه]

الحمد لله على سلامة سيارتك

وفعلا الشباب ما يقصرون

تحياتي : ابن صقيه

[أبو عرب]

والله اخوي معه 2002 نفس مشكلتك وسواله ميكانيكي فتح في البلف او مادري وش سماه والحمدلله

وعندك سوري جيد في المكسيمات اول ما تجي تشليح الحاير تلف يمين مع الدخلة الرئيسية تمشي حول 50 متر تلقاه على يسارك هذا اذا انت بالرياض