اللي حصل معاي في معرض الكويت

[عبدالعزيز العنزي]

السلام عليكم
الموضوع بإختصار سمعت ان في معرض الكويت بيحطون الجيتي الجديد وقلنا بنروح نشوفها يمكن اشتري وحده وانا بالطريق مع احد اصدقائي قال يمكن سعرها 10 الاف او 11 الف
ورحنا وشفنا السياره وحولها ناس واجد وقررنا نسأل موظفين نيسان عن سعرها
ويوم سألناهم انصدمنا بصراحه قالت الموظفه سعرها يتراوح من 20 الى 26 الف دينار كويتي
اغلبيتكم يعرف ان الجيتي سعرها بمتناول غالبية الشعب لكن بالسعر هذا ما اعتقد كل الناس يقدرون يشترونها وانا واحد من الناس صرفت النظر عنها بسبب سعرها
وحاب اسمع رايكم وتعليقاتكم بخصوص غلاء سعرها

[ددتسن85]

تصدق سعرها اشك ان النيسان خسران فيه!!

مافي سيارة قوية رخيصة ابدا ابدا ابدا
كل ماصارت السيارة اقوى كل ما كانت اغلى

وهم ليش حطو الزد الى علشان الي مايقدر على الجي تي ياخذه

والجي تي ار اقوى من الz06 والفابير والبورش تيربو وارخص منهم كلهم

[me_only]

كلام ددتسن85

1000000% صحيح

[آمري ياكامري]

انا سالت عنها في معرض الرياض الدولي وسعرها بربع مليون وصراحه تستاهل السعر
ولو كانت في متناول الجميع بتلقاها كثر الذر
عندك الزد مثلا سعره عال 138 وكاله ومستعمل بين 70 وال 80 ومع ذلك نادر وجوده مره

[عبدالعزيز العنزي]

ياجماعه لاتنسون ان الجي تي ميزتها انها بمتناول الجميع
كلكم يسمع من اخوه الكبير او خاله او عمه او حتى ابوه عن مغامراتهم وقصصهم مع الجي تي
وكانوا يشترونها لانهم قادرين على سعرها وهذي من ميزات الجي تي
بس بالسعر هذا راح تختفي شعبيتها نظرا لسعرها وتصير مجرد صور او بوسترات او سيارة الاحلام مثل مايقولون اتمنى وضح قصدي

[NISSAN ?]

السلام عليكم ورحمة الله وبركاتة
مافي شي يضل على وضعة
والسيارة ترى رخيصة بالنسبة لنظيراتها
دفع رباعي تيربو والكثير
انت شوف المنافسين وشوف اسعارهم وشوف الجيتي
نفس الحكاية مع الالتيما
الاكورد والكامري غاليين لكن الالتيما اقوى واجود وارخص
لاتنسى نيسان تسعى لارضاء العميل
عبد العزيز العنزي كلامك صح
بس السيارة لما تنطرح بالسوق لازم تشوف الي ينافسونها وتوزن السعر
بالنسبة للوضع الأقتصادي انا عن نفسي ماأملك المبلغ
السوق والناس بحددو قيمتة ان ما مشى غصبن عنهم بينزلوة
والزد سعرة رخيص لكن مايمشي مادري ليش السيارة قوية تاريخية ليها كلمتها لكن تفتقر لمبيعاتها في السعودية
كلامي عن زد350 والسعر ممتاز بالنسبة لحالتي الاقتصادية مو لازم اخد جي تي في غيرة زد انفنتي كوبية والكثير

تحياتي

[محمد فكري]

في السابق الجي تي ....قوي ولكن

لو تشف الداخلية .....مشبعة بالمواد الرخيصة

وحتا تصميمه وصناعته تختلف تماما عن الحالي

واغلب الخلق الي شفتهم وشافوا الموتر ماكانو يتوقعون ان سعره 300 الف ...بل كانو يتوقعون اكثر ....!!!!!!!!

[عبدالعزيز العنزي]

اخوي نيسان انا ماتكلم عن المقارنه اكيد الجي تي افضل من منافساتها لكن الجي تي لها خصوصيتها التاريخيه عندنا بالخليج عن سبيل المثال منطقتي اللي انا فيها الحين ايام الثمانينات قليل تحصل بيت ماتلقى قدامه جي تي وحده او ثنتين يعني انا اتكلم عن شعبيتها وشعبيتها جت ناتج جودتها+قوتها + سعرها المناسب للجميع
لكن بالسعر هذا 26 الف دينار كويتي اعتقد راح تكون حالها حال الزد الجديد من حيث الاقبال والشعبيه

[خطر الداتسون]

السابق الجي تي ....قوي ولكن

لو تشف الداخلية .....مشبعة بالمواد الرخيصة

وحتا تصميمه وصناعته تختلف تماما عن الحالي

تحياتي خطر الداتسون

[سعودي]

اخوي محمد كلامك صحيح لكن الجي تي هذي مالها اي علاقه بالجي تي الي كنا نعرفه

وهذي السياره تستهدف شريحه معينه من المجتمع او بالاخص محبين البورش و القلارادو ..الخ

من عرفنا الجياتي من 77 لغاية 89 كانت تنزل عندنا بالخليج(باستثناء السعوديه)

سياره رياصيه وعائليه وتطلع عليها البر واسعارها معقوله وكانت تتحمل(يعني عطالها قليل)

طبعاً كان فيه نوعين الي ينزل عندنا فئه s (الي يجيبهم الوكيل المعتمد)يعني سبورت ماهو r اختصار لكلمة رالي

اما gtr ماكان يجيبونها الوكلاء وبدوا شباب الامارات يجيبونها على ايام طلعة الجي تي ار الاصفر(فيوتسر) وكانت اسعارها فوق 140000 درهم وهي حتى مالها قطع غيار متوفره ويجيبونها مستخدمه من اوروبا واستراليا وامريكا

كنت اتمنى انهم طوروا الزد وخلوا الجي تي في متناول الطبقه الوسطى لكنهم سوو العكس يمكن لان سمعة gtr تقدر تساعدهم لتنافس اي سياره رياضيه اخرى

[عبدالعزيز العنزي]

انا اقول لو مسوين العكس احسن يعني لو مخلين الجي تي سعرها متوسط وتجي سبورت واربع ابواب
والزد تنافس البوش ومابورش

[محمد فكري]

انا اقول لو مسوين العكس احسن يعني لو مخلين الجي تي سعرها متوسط وتجي سبورت واربع ابواب
والزد تنافس البوش ومابورش

مستحيل يحطون الزد بدل سيارة عمرها حوالي 50 سنة ....الحين الزد متا صار بمستوى الجيتي ار !!!!

وحتا كارلس غصن قال ان انهم يريدون صنع سيارة تحمل كل تكنولوجيا شركة نيسان ولم يجدوا الا الجي تي ار هي افضل سيارة تحمل على عاتقها اسم الشركة

[سعودي]

وهذا من الاسباب الي خلتهم يختارون ال جي تي

مع ان هالجي تي مالها علاقه بالجي تي القديم المعروف لان الجي تي كان اسمه مرتبط بالداتسن اول مانزل وبعدين السكايلان وهذي مالها اي علاقه بهالاسمين العريقين

[Ra3y_Datsun]

مازال السعر ممتاز بالنسبة لهذه التحفة والمزودة بالتقنية الحديثة التي زودت بها.

هذه جي تي أر وليس لها علاقة بالسكاي لاين المسكينة التي كانت تورد للخليج في السابق

لابد لنيسان من أخذ هذا المنحى التاريخي وصناعة سيارة سوبر سبورت في هذا الوقت المهم جداً

لنيسان والأهم من ذلك مفاجئتها للعالم والصناع بقدرتها من إستخراج قوة هائلة من محرك سداسي

الإسطوانات ودفع رباعي و وزن نوعاً ما أثقل من المطلوب ويرجع ذلك لأن الجي تي أر الجديدة أكبر

في الحجم من البورش 911 (يعني كما وصفوها المحللون بأنها ضخمة وأربع ركاب وجهاز ناقل جديد

كل هذا ولم يخذلهم المحرك الذي تم تطويرة سنوات ليلبي أرقام السيارات السريعة السوبر رياضية)

أنسوا مسألة سكاي لاين وبكرات من الخلف تنزل وترتفع ولما تدعسها تنزل للأرض من ليونة الطيات إللي فيها

فهذا عهد جديد لنيسان فا الجي تي أر حقبة جديدة كلياً على جميع الصناع وعامل صداع للجميع في المانيا وديترويت

ولتويوتا بطوكيو . فقد بداء الكثير من عشاق تويوتا في طوكيو بحجز نسختهم من الجي تي أر .

فقط المطلوب حالياً التصفبق وبشدة لهذا الصانع الشاطر (نيسان) .

والجي تي أر ليست الأقوى في السيارات بل يوجد الكثير من السيارات التي هي أقوى وأفخم منها بكثير

ولكن نحن نتكلم عن أرقام ومواصفات جميلة جداً لم نعهدها من صانع ياباني من قبل فلنفرح لهذا الشئ

ونلتزم في حدود المعقول.

تحياتي ,,

.

.

[فارس المكسيما]

بصراحة الجيتي مووووووووووووتر رهيب